تاج لك..وتاج عليك!!

قبل القراءة يا ريت تخلي اتجاه الصفحة من اليمين للشمال..وشكراً..

سلام عليكم..إزيكم يا شباب إيه الأخبار؟ تمام التمام؟

المهم..فعلاً صدق المثل القائل: تاج لك وتاج عليك!! وآدي أول تاج ليا في المدونة دي والحمد لله:

تاج لك..وتاج عليك!!

أحب شخص لقلبك في الدنيا؟
سيدي وحبيبي ومولاي أبو القاسم سيدنا محمد عليه الصلاة والسلام..ثم والدتي ووالدي..ثم أخواتي..
انسان مستعد تضحي بحياتك عشانه؟
كل ما سبق^^..ثم صديق وأخ مخلص..ثم أي شخص يستحق التضحية عشانه...
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
أنا مش شرير للدرجة دي بصراحة^^..لكن لو أنصفت...أي شخص ظالم..وأي رئيس وزراء إسرائيلي!
ما هو اسم اجمل كتاب كتبه بشر قراته ومحتفظ بيه حتي الان ؟
كتير..لكن كتب الدكتور أحمد خالد توفيق دي كفاءة وتحفة لازم أحتفظ بيها^^
اسم كتاب -كتبه بشر برضة- انت متعلق بيه وبتقرأه كل فترة؟
نفس الإجابة السابقة^^
جهاز منزلى انت متعلق بيه او بتستخدمه كتير؟
الكمبيوتر طبعاً..التلفزيون..المروحة في الصيف!!
مكان تحس بالراحة النفسية عندما تراه؟
المسجد الحرام..المسجد النبوي الشريف..أي جامع..البييييييييييت!!
ان تحس فيه بالحنين الى شىء لا تدرى ماهو و ذكريات جارفة الى شي؟
المكان اللي أنا حاطط فيه الكمبيوتر!! الكلية..مدرستي القديمة..
مكان تحس بالراحة عندما تدخله؟
البييييييييت برضه! والجامع، و..إحم! الحمام XD..
اجمل مدينة زرتها داخل مصر؟
القاهرة واسكندرية وجمصة ^^
واجمل منظر طبيعي داخل مصر ؟
مش فاكر بالضبط..بس معظم المناظر الطبيعية حلوة والحمد لله.
شخصية كارتونية بتحبها؟؟
آآآه..سؤالي المفضل! والله أنا بفضل شخصيات الأنمي مش الكارتون..وما زلت مصر إن الأنمي حاجة والكارتون العادي حاجة تانية خالص..مش موضوعنا..المهم شخصياتي المفضلة من بعض الأنميات:
-أنمي بليتش Bleach: ايتشيجو كوروساكي (راجع نفس التاج لأحمد المصري) - تشاد - أوريهيمى إينوى - زانجتسو..
-أنمي القناص Hunter X Hunter: جون و كيلوا وكورابيكا..
-أنمي ساكورا CardCaptor Sakura: ساكورا (طبعاً!!!)-تومويو- كيربيروس - يوى...
-أنمي (أعتم من السواد) Darker Than BLACK: هيي - ين -ماو...
-أنمي مفكرة الموت Death Note: إل - نيير..
-أنمي يوغي يو Yu-Gi-Oh: يوغي-الفرعون-جوي ويلر (جونتشي زي ما بيسموه في اليابان!)
عشان مطولش أكتر من كده: أنمي النجمة المحظوظة Lucky Star: كوناتا وتسوكاسا..
آسف جداً للإطالة لكن أنا بقول اللي في قلبي لا أكثر! ولو عاوزين عنهم أي معلومات اسألوني شخصياًَ أو شوفوا ويكيبيديا..
نوع هاتفك المحمول؟
إل جي U8330..مش منتشر أوي لأنه جاي من برة^^..موبيل عادي رغم شكله الحلو ^^
بالنسبة لسرعة بروسيسور الجهاز وحجم الهاردوحجم المواد الاسلامية والكلام دا؟
البروسسور 3 جيجا والحمد لله..الهارد 160.. حجم المواد الإسلامية مش كبير أوي يعني بالنسبة للسعة..لكن عموماً كلها في القلب والحمد لله^^
أهم هدف انت واضعه لحياتك الآن؟
أعدي من عقبات كتير قدام مستقبلي..وإني أكتب أحسن قصة في حياتي..لسه مكتبتهاش والله أعلم هوصلها ولا لأ..وإني أشوف أحسن أنمي أنتجته إيد بشر!!
مواصفات فتاة الأحلام بالنسبة لك؟
مش بحب أفكر في الحكاية دي كتير عشان متعقدش^^ لأني غالباً مش فتى الأحلام لأي فتاة!! عموماً..تكون أولاً محترمة..لطيفة ^^..وفاهمة أفكاري وتقدر تفهمني كويس^^بس كده!
صف ما يأتى:شعورك لما بتسمع كلمة مصر ؟
حاجات كتيييير..فخر..حزن لبعض أحوالها..ارتياح نفسي كبير..و...مش عارف! ^^
شعورك لما بتسمع كلام عن اليهود؟
قرف!! ورغبة عارمة في إني أولع في وشي!! (من الغضب يعني ^^)
شعورك لما بتشوف ظابط شرطة؟
احترام..وتقدير لجهوده رغم كل شئ..
شعورك لما بتشوف الكناس العجوز فى الطريق؟
احترام وتقدير..دورهم والله كبير جداً لكن محدش بيقدر للأسف!
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
فخر..وتمني إني أكون زيه لكن قلباً وقالباًَ مش مجرد مظهر!
اسم مدونتك؟
هممم..اسمها (من مفكرة حالم) يعني من مفكرتي^^
لماذا اخترته..وماهي نيتك من وراء اختياره؟
أبداً..حسيت إنه اسم يعبر عن مضمون المدونة..لأن فيها أفكاري وأحلامي وأفراحي وحتى أحزاني^^,,ثم أنا شايف نفسي حالم كبير..فقلت أسميها كده عشان يبقى الاسم مناسب ^^..
هل فكرت في إغلاق مدونتك؟..والسبب؟

ده أنا لسه بقول يا هادي! أنا لحقت؟؟
صورتك في المدونة..رمزيتها؟

صورتي لشخصية مشهورة أوي من انمي القناص اسمه (جون)..هو كان فيها بيقاتل واحد نينجا قوي في اختبار الصيادين رغم إن مفيش مقارنة بينهم في القوة خالص! وجون كان بيقاتل لهدف نبيل..والنينجا ده حاول يقتله وحط السيف على راسه وهدده بالقتل لو مستسلمش، لكنه رفض بإصرار..باختصار..دي صورة بتدل على الإصرار على تحقيق الهدف..وعجبتني!
لماذا دخلت عالم التدوين من الاساس؟

عن طريق صاحبي وحبيبي د/أحمد المصري صاحب مدونة (كن رجلاً)..هو اللي عرفني بالعالم الجميل ده فقررت أدخله!
احلى جمله قيلت لك فى وصف مدونتك؟

همم..رغم إن فيها مبالغة شوية..(مدونة جامدة جداً!) رغم إني مش شايف كده خالص^^
التعليقات بالنسبه لك ..اهميتها؟

مهمة طبعاً..عن طريقها بحس إن فيه تفاعل وإن فيه حد بيقرا كلماتي دي..وده اللي بيحمسني إني أفضل فاتح المدونة دي!!
مااحلى بوست كتبته ...ضع اللينك ..ثم اذكر لماذا؟

في رأيي..(عزيزتي.ساكورا)..وناس كتير بتقول إن (عجبت لأمر) حلوة أوي..عموماً الاتنين موجودين تحت خالص لأني مكسل أحط اللنكات!! XD
أحلى مدونة قريتها؟

هممم..كتيييييير..وكلهم حلوين والله بس مش عاوز أقول أسماء لحسن تحصل مشاكل ^^
أفضل بوست قرأته؟ وضع لينكه؟

والله أنا حتى اللي كلته امبارح ما فاكره..فما بالك بمئات البوستات اللي قريتها؟؟!
حد قل ادبه في التعليق؟عملت ايه؟أسوأ مدونة؟ أسوأ بوست؟

لا محصلش والحمد لله..وبرضه مش فاكر أسوأ مدونة ولا بوست!!
ايه اللي حيصل لإيميلك لما تموت ؟
دي حاجة في علم الغيب..عموماً هو مش هيتفتح غالباَ لحد ما يتقفل لوحده ^^
اديت الباسوورد لحد قبل كده ؟
نادراً جداً وللشديد القوي يعني!
اسمك؟
فيه اختيارات؟؟ ^^ قصدي..اسمي الحقيقي: محمد الوكيل..اسمي في المدونة محمد المصري..وفي مواقع كتير اسمي باتمان2004..
اسم الدلع المشهور وسط أصحابي؟
هممم..حمادة..وأحياناً كانوا بيسموني (محمد سبيستون) (!!!!) لكن بطلوا والحمد لله..وبصراحة مش بحب اللقب الأخير ده..فيه سخرية ^^"
مجال دراستك؟
طب بشري بالصلاة على النبي ^^..
شخصيتك نوعها ايه؟
هممم..بحب البساطة جداً..مرح وبهزر كتير حتى لو الموقف منيل بنيلة (!!)..أحياناً عصبي وساعتها ببقى صعب أوي (!)..بحب أكون مختلف دايماً وده بيعملي مشاكل أحياناً..كسلااااااان أحياناً ونشيط لدرجة رهيبة أحياناً..بحس بالوحدة أحياناً رغم إني محاصر بالناس..بفكر كتير وفي أي حاجة رغم إنه مش بيبان عليا..بحب أكلم نفسي أو شخصيات وهمية أحياناً (فاضلي زلطة وادخل المرستان XD)..بكره الدوشة وبحب الهدوء..وأكرر: بحب البساطة بشدة!
بتعمل ايه في وقت فراغك؟

الكمبيوتر والنت..والقراءة أحياناً، أو الفرجة على التلفزيون..عادي يعني.
السفر بالنسبة لك؟
حدث تاريخي بالنسبة لي! بحبه جداً لكن بحب البيت والوطن أكتر ^^

الأكلة المفضلة؟
أي حاجة ما دام حلال وحلوة! وغالباً أكل البيت أو الشوكولاتة..والأخيرة دي بحبها بشكل خاص جداً! وبحب سندوتشات الفول والطعمية بشدة!
الصفات اللي اخدتها من بابا؟

التفكير الكتير..العند أحياناً..حب الأسرة..حب البيت!..طريقة مشيه وكلامه أحياناً!
الصفات اللي خدتها من ماما؟

كتير..مثلاً حب الهزار..العصبية أحياناً..البساطة..
أكتر 6حاجات بتكرها؟
الرخامة! - إسرائيل! - الظلم - الاستسلام - كايبا من أنمي يوغي يو!! - فيروسات الكمبيوتر واللي بيصمموها واللي بينشروها!!

اكتر 6 حاجات بحبها؟

مصر - الكمبيوتر والنت - الصلاة - الحياة - الأنمي والمانجا (مش الفاكهة!!) - الفن الجميل أيا كان نوعه -حاجة أخيرة: العمل المتقن..حتى في الرخامة!!
الشغل بالنسبة لك ؟
بحبه بس لو يكون شغل من النوعية اللي بفضلها ^^
ايه الكمبيوتر والنت بالنسبة لك؟

عالمي الحقيقي وحياتي..وأخويا وابني (آه تخيل!!) وحبيبي وكل حاجة..لو النت فصل بحس كأن الأورطى عندي اتقطع! ولو الكمبيوتر عطلان بحس كأن ابني عيان!!
أباصيه لمييين؟
الأخت ولاء (والقادم أجمل) - الأخت شيماء (البساط السحري) - عمر هشام (Just Me)..وأي حد عاوزه!

كده التاااااج خلص..يا رب متكونوش زهقتوا من رغيي ^^

شكراً..محمد المصري