بسم الله..نبداً!!

بسم الله الرحمن الرحيم نبدأ وعلى بركة الله، نفتتح هذه المدونة الجديدة..وإني لأرجو من الله العلي القدير أن أنفع بها وأنتفع إنه على ما يشاء قدير..

بداية، أحببت أن أعرفكم بشخصي المتواضع..أنا أخوكم في الله محمد المصري (طبعاً مش اسمي الحقيقي ^^)..طالب طب في السنة الأولى بكلية طب جامعة طنطا والحمد لله على كل حال..عمري 17 سنة لحظة كتابة السطور دي..

فيه منكم بيسألوني..إيه هواياتك؟ يعني بمعنى آخر :إيه الحاجات اللي بتحب تمارسها في وقت فراغك -إن وجد؟!-

أنا والحمد لله أحب القراءة والقراءة كثيراً جداً..أكتب بعض القصص القصيرة وبعض الخواطر المتواضعة..كذلك أحب مسلسلات الأنمي..وأحبها بشدة كذلك!!

سيسأل البعض..ما هو الأنمي؟ أو يعني إيه أنمي ده؟؟

ببساطة..الأنمي هو مسلسلات الرسوم المتحركة اليابانية! وقبل ما تفهموا غلط أحب أوضح لكم إن الانمي مختلف عن مسلسلات الكارتون اللي بعضنا -أو معظمنا مش متأكد- حبها وشافها..الأنمي ده رسوم متحركة لكن يابانية ومصنوعة بأيدي يابانية ماهرة ومبدعة..باختصار أعتبره فناً راقياً لا يختلف كثيراً عن السينما أو المسرح أو الرواية..بل إن بعض أعمال الأنمي تكون أساساً مأخوذة من روايات عالمية..

وممكن بعضكم يكون عارف الأنمي..وأغلبكم مش هيعرفه..وعشان أقرب الصورة، مسلسلات الأنمي فيه منها المشهور جداً في العالم العربي زي يوغي يو Yu-Gi-Oh أو القناص Hunter X Hunter وغيرها كتير..

على كل حال مش هطول عليكم..لو كنت بتحب الأنمي هنقدر نفهم بعضنا كويس ومن غير مشاكل..ولو مكنتش تعرفه هساعدك بإذن الله تعرفه كويس وتحبه كمان بإذن الله..

ماااا علينا..هدف المدونة؟؟ زي ما قرأت في العنوان..هي ببساطة صفحات من مفكرتي..أكتب فيها أحلامي..أفكاري..أهدافي..أفراحي بل وربما أحزاني أحياناً..ولو أمكن نتناقش فيها ونتعارف ويكون بيننا -إخواني القراء والمدونين- روابط صداقة قوية وتجمعنا الإخوة والمحبة في الله..

أرجو إني ماكونش تقلت عليكم..وانتظروا قريب جداً بإذن الله أول تدوينة هنا..وأرجو من الله إن المدونة تكون مصدر نفع وإفادة لكم إخواني..

شكراً إخواني لحسن القراءة والسلام عليكم..

محمد المصري..

ملحوظة:شكر خاص جداً وحار جداً لأخويا وحبيبي أحمد المصري لمساعدته الكبيرة ليا..جزاك الله خير يا حمادة وربنا يوفقك..